علق النجم المصري أحمد السقا، على "فيديو" دعمه لنجم الكرة المصرية محمد صلاح، قائد منتخب مصر ولاعب ليفربول الإنجليزي، والذي نشره على مواقع التواصل الاجتماعي المختلفة.

حيث قال السقا خلال اتصال هاتفي مع برنامج «الحكاية» عبر شاشة «mbc مصر»، مساء السبت: «كنت بلبس علشان أروح فرح بنت محمد هنيدي تصفحت التليفون لقيت صورة لمحمد صلاح وكان يبكي فصِعب عليّ جدا.. أخدتني الجلالة وطلعت عز الدين أيبك اللي جوايا، وعملت فيديو لدعم أخويا محمد صلاح اللي مشرفنا».

وأشار السقا عن فيديو دعمه لمحمد صلاح: «كنت بحمِّس محمد صلاح واخترت أوجِّه رسالة باللغة الإنجليزية علشان وسائل الإعلام هناك بتكتب عننا.. واستخدمت أعلى مصطلح علشان أوصلهم إن اللي بيتكلم على أعلى قدر من الدراية والعلم وإن اللي بتعملوه مع صلاح هيخسر ليفربول جماهير كتيره في العالم العربي».

وأضاف: «ربما خانتني بعض الألفاظ لكني لم أخطأ في لفظ كوتش فهو مصطلح نستخدمه في مصر لكن يبدو أنه في الغرب يفهم بمعنى تاني وكان حديثي بحسن نية وربنا مطلع على القلوب، الفيديو اللي قلته باللغة الإنجليزية فضل 55 دقيقة والفيديو اللي كان باللغة العربية كان 6 ساعات.. ومش أنا اللي حذفت الفيديو وأنا مش بعمل حاجة غلط ولا بجري في خناقة».

وأعرب السقا عن استيائه من سلوك المصريين والعرب، وقال: «أول ما الفيديو العربي اتعرض كانت ردود الفعل إيجابية باستثناء بعض الناس اللي دخلت السياسة في الدين وفي غزة».

وأكد: «بعدها نزلت الفيديو الإنجليزي وأنا مش بخاطب مجلس إدارة ليفربول لكني قلت لعل وعسى تصل رسالة من مواطن عربي بيدعم ابن بلده لإن إحنا عددنا كبير وقلة قليلة فقط هي اللي ممكن تكون واخدة من صلاح».

وأكمل السقا تصريحاته قائلًا: «أنا مشفق على اللي قاعد وراء الشاشة هو أنا هجيبه منين.. أنا مستعد أعتزل تمثيل وأقطع كارنيه النقابة وأبقى مواطن عادي وأقول بقى اللي يعرف يكلمني يوريني نفسه بس أنا متربي ومقدرش أقول كده».

للمزيد تابع

خليجيون نيوز على: فيسبوك | إكس | يوتيوب | إنستغرام | تيك توك